Konkan Railway | राजापूरवासियांना कोकण रेल्वेने दिली ‘गुड न्यूज’

• गणेशोत्सवाच्या तोंडावर ‘नेत्रावती’ एक्सप्रेस राजापूर रोड स्टेशनवर थांबणार!

राजापूर : कोकण रेल्वेने राजापूरवासियांना एक मोठी भेट दिली आहे. आतापर्यंत अनेक महत्त्वाच्या गाड्यांना थांबा नसलेल्या राजापूर रोड स्टेशनवर, लांब पल्ल्याच्या ‘नेत्रावती’ एक्सप्रेसला (16345/16346) प्रायोगिक तत्वावर थांबा देण्यात आला आहे. यामुळे मुंबई, गोवा, आणि केरळला जाणाऱ्या प्रवाशांना मोठा दिलासा मिळणार आहे.
राजापूर रोड स्थानकावर थांबणाऱ्या नेत्रावतीचे  वेळापत्रक खालीलप्रमाणे :

• गाडी क्रमांक 16345 (लोकमान्य टिळक (ट) – तिरुवनंतपुरम सेंट्रल ‘नेत्रावती’ एक्सप्रेस): ही गाडी राजापूर रोड स्टेशनवर रात्री 19:40 वाजता पोहोचेल आणि 19:42 वाजता पुढे रवाना होईल. या थांब्याची सुरुवात 15/08/2025 पासून होणार आहे.
• गाडी क्रमांक 16346 (तिरुवनंतपुरम सेंट्रल – लोकमान्य टिळक (ट) ‘नेत्रावती’ एक्सप्रेस): ही गाडी राजापूर रोड स्टेशनवर सकाळी 07:38 वाजता पोहोचेल आणि 07:40 वाजता मुंबईच्या दिशेने मार्गस्थ होईल.
  प्रवाशांची गेल्या अनेक वर्षांपासूनची मागणी कोकण रेल्वेने पूर्ण केल्याने स्थानिकांमध्ये आनंदाचे वातावरण आहे.
• या थांब्यामुळे कोकणच्या विकासाला आणखी गती मिळेल अशी अपेक्षा व्यक्त केली जात आहे. मुंबईहून कोकणात येणाऱ्या चाकरमान्यांना आणि कोकणातून बाहेरगावी जाणाऱ्या प्रवाशांना याचा सर्वाधिक फायदा होणार आहे. त्यामुळे आता राजापूर रोड स्टेशनवरून थेट मुंबई आणि दक्षिण भारतात प्रवास करणे अधिक सोयीस्कर होणार आहे.
  या निर्णयामुळे काय फायदा होईल?
• प्रवासाची सोय: मुंबई आणि दक्षिण भारताशी थेट कनेक्टिव्हिटी वाढेल.
• वेळेची बचत: प्रवाशांचा राजापूर रोडहून इतर मोठ्या स्टेशनवर जाण्याचा वेळ वाचेल.
  कोकण रेल्वे प्रशासनाने घेतलेल्या या सकारात्मक निर्णयाचे राजापूरमधील नागरिक आणि विविध प्रवासी संघटनांनी स्वागत केले आहे.