अमेरिकेतील आर्याला पडली चिपळूणच्या ‘युनायटेड गुरुकुल’ची भुरळ!

• भारतीय संस्कृतीच्या ओढीने सलग ३ वर्षे येतेय भारतात!

​चिपळूण: पाश्चात्य जीवनशैलीच्या झगमगाटात राहूनही आपली मुळे विसरू नयेत, यासाठी अमेरिकेतील शिकागोमध्ये राहणारी नऊ वर्षांची आर्या दरवर्षी सात समुद्रांपार चिपळूणच्या युनायटेड इंग्लिश स्कूलमधील ‘पंचकोशाधारित गुरुकुल’ विभागात शिक्षणाचे धडे घेण्यासाठी येत आहे. भारतीय संस्कृती आणि प्राचीन शिक्षण पद्धतीचा वारसा जपणाऱ्या या गुरुकुलचे कौतुक आता सातासमुद्रापार पोहोचले आहे.

​पंचकोशाधारित शिक्षणातून व्यक्तिमत्व विकास

परशुराम एज्युकेशन सोसायटी, चिपळूण संचलित युनायटेड इंग्लिश स्कूलचा हा गुरुकुल विभाग विद्यार्थ्यांच्या सर्वांगीण विकासासाठी कार्यरत आहे. भारतीय तत्त्वज्ञानातील अन्नमय, प्राणमय, मनोमय, विज्ञानमय आणि आनंदमय अशा पाच कोशांच्या आधारे येथे अध्यापन केले जाते. दिवसातील ११ तास आणि वर्षातील २६० दिवस चालणारे हे अनोखे गुरुकुल संस्कार, कौशल्य प्रशिक्षण आणि विज्ञान-तंत्रज्ञानाची सांगड घालते.

​शिकागो ते चिपळूण: एक अनोखा प्रवास

आर्याची आई, सौ. संपदा (युनायटेड इंग्लिश स्कूलच्या माजी विद्यार्थिनी) आणि वडील श्री. रोहित (सॉफ्टवेअर इंजिनिअर) अमेरिकेतील शिकागोमध्ये स्थायिक आहेत. आपल्या मुलीला भारतीय संस्कृतीची ओळख व्हावी आणि येथील शिक्षण पद्धती समजावी, या उद्देशाने त्यांनी आर्याला गुरुकुलमध्ये पाठवण्याचा निर्णय घेतला.

​”पाश्चात्य जगात राहताना आपल्या मुलीने भारतीय मूल्ये आणि परंपरा आत्मसात कराव्यात, यासाठी गुरुकुल हा सर्वोत्तम पर्याय वाटला,” अशी भावना सौ. संपदा यांनी व्यक्त केली.

​आर्याचा दिनक्रम: उपासना ते भात लावणी!

​अमेरिकेतील शाळेला सुट्टी लागली की आर्या आवर्जून चिपळूणच्या गुरुकुलमध्ये दाखल होते. तिचा येथील सहभाग थक्क करणारा आहे:

• ​सकाळची सत्रे: उपासना, प्रार्थना, व्यायाम आणि योगासने.
• ​दैनंदिन शिक्षण: संगणक ज्ञान, संगीत आणि हस्तकौशल्य.
• ​विशेष उपक्रम: चिखलात उतरून केलेली भात लावणी, आषाढी एकादशी सोहळा, स्वहस्ते गणेशमूर्ती तयार करणे आणि निवासी शिबिरे.

​पालकांसाठी प्रेरणादायी निर्णय

​आजच्या काळात जिथे पाश्चात्य संस्कृतीचे अनुकरण करण्याची चढाओढ लागली आहे, तिथे अमेरिकेत शिकणाऱ्या आर्याने भारतीय संस्कृतीचा स्वीकार करणे आणि तिच्या पालकांनी घेतलेला हा निर्णय कौतुकास्पद ठरत आहे. आर्याचा हा उत्साह गुरुकुलमधील इतर विद्यार्थ्यांसाठीही प्रेरणादायी ठरत आहे.