Amrit Bharat Express : केरळमधील अमृत भारत एक्सप्रेसच्या शुभारंभावेळी संस्कृती आणि तंत्रज्ञानाचा संगम!
अमृत भारत एक्सप्रेस'चे शाही स्वागत; तिरुवनंतपुरम स्थानकावर शास्त्रीय नर्तकींच्या अदांनी सजला सोहळा!
तिरुवनंतपुरम: भारतीय रेल्वेच्या आधुनिकीकरणाचा नवा चेहरा असलेल्या ‘अमृत भारत एक्सप्रेस’चा (Amrit Bharat Express) केरळमध्ये दणक्यात शुभारंभ झाला. तिरुवनंतपुरम रेल्वे स्थानकावर या गाडीच्या स्वागतासाठी केरळच्या समृद्ध संस्कृतीचे दर्शन घडले. पारंपारिक वेशभूषेतील शास्त्रीय नर्तकींनी या सुसज्ज ट्रेनसमोर दिलेली पोझ सध्या सोशल मीडियावर आकर्षणाचा केंद्रबिंदू ठरत आहे.
संस्कृती आणि तंत्रज्ञानाचा संगम
पंतप्रधान नरेंद्र मोदी यांनी नुकतेच केरळला ३ नवीन अमृत भारत एक्सप्रेस आणि एका पॅसेंजर ट्रेनची भेट दिली. तिरुवनंतपुरम सेंट्रल स्थानकावर जेव्हा ही ट्रेन दाखल झाली, तेव्हा ती फुलांनी आणि माळांनी अतिशय सुंदररीत्या सजवण्यात आली होती. यावेळी केरळच्या प्रसिद्ध मोहिनीअट्टम आणि कथकली या नृत्यशैलीतील नर्तकींनी ट्रेनसमोर उभे राहून या ऐतिहासिक क्षणाची शोभा वाढवली. आधुनिक ‘पुश-पुल’ तंत्रज्ञान आणि केरळची पुरातन कला यांचा हा संगम प्रवाशांच्या डोळ्यांचे पारणे फेडणारा ठरला.
अमृत भारत एक्सप्रेसची प्रमुख वैशिष्ट्ये
- परवडणारा प्रवास: कमी तिकीट दरात वंदे भारत सारख्या आधुनिक सुविधा.
- वेगवान प्रवास: पुढच्या आणि मागच्या दोन्ही बाजूंना इंजिन असल्यामुळे (Push-Pull Technology) वेगवान प्रवेग (Acceleration).
- आरामदायी सुविधा: मोबाइल होल्डर्स, आधुनिक टॉयलेट्स, गादीच्या जागा आणि झिरो-जर्क प्रवास.
- सर्वसमावेशक: ही ट्रेन प्रामुख्याने मध्यमवर्गीय आणि सामान्य प्रवाशांच्या सोयीसाठी डिझाइन केली आहे.
केरळला जोडणारे नवीन मार्ग:
१. तिरुवनंतपुरम – तांबरम (चेन्नई)
२. नागरकोइल – मंगळुरू (मार्गे तिरुवनंतपुरम)
३. तिरुवनंतपुरम – चारलापल्ली (हैदराबाद)
या गाड्यांमुळे केरळची तामिळनाडू, कर्नाटक आणि तेलंगणाशी असलेली कनेक्टिव्हिटी अधिक मजबूत होणार आहे. विशेष म्हणजे, एका ट्रेनचे संचालन पूर्णपणे महिला क्रू (All-Women Crew) द्वारे करण्यात आले, जे रेल्वेमधील महिला सक्षमीकरणाचे मोठे उदाहरण ठरले.
