छत्रपती शिवाजी महाराज यांचा खोटा इतिहास दाखवणारा ‘खालिद का शिवाजी’ चित्रपटावर बंदी घाला

• हिंदू जनजागृती समितीची मागणी

रत्नागिरी, ६ ऑगस्ट :  ‘खालिद का शिवाजी’ या चित्रपटामधील छत्रपती शिवाजी महाराजांसंदर्भातील खोटी व तथ्यहिन माहिती देऊन समस्त शिवप्रेमींच्या धार्मिक भावना दुखावल्याप्रकरणी त्या चित्रपटावर बंदी आणण्याबाबत आज रत्नागिरी येथे हिंदू जनजागृती समितीच्या वतीने केंद्रीय गृहमंत्री आणि महाराष्ट्राचे मुख्यमंत्री तसेच जिल्हाधिकारी यांच्या नावे अप्पर जिल्हाधिकारी श्री. भाऊसाहेब गलांडे यांना हे निवेदन देण्यात आले.

‘खालिद का शिवाजी’ या चित्रपटात छत्रपती शिवाजी महाराजांच्या सैन्यात ३५% मुस्लिम होते, महाराजांचे ११ अंगरक्षक मुस्लिम होते, तसेच रायगडावर महाराजांनी मशिद उभारली होती, असे स्पष्टपणे दाखवलेले आहे. वरील सर्व दावे ऐतिहासिकदृष्ट्या चुकीचे, तथ्यहिन व मूळ ऐतिहासिक नोंदींशी विसंगत असून हे केवळ छत्रपती शिवाजी महाराजांना “धर्मनिरपेक्ष” (सेक्युलर) दाखवण्याच्या हेतूपूरस्सर प्रयत्नाचे उदाहरण आहे. कोणत्याही अधिकृत बखरींमध्ये, ऐतिहासिक दस्तऐवजांमध्ये, पेशवाई, इंग्रज वा मुघल काळातील अभिलेखांमध्ये या गोष्टींचा उल्लेख नाही.
त्यामुळे अशा खोट्या व भ्रामक माहितीच्या आधारे चित्रपट प्रदर्शित करणे म्हणजे छत्रपती शिवाजी महाराजांच्या कार्याचा आणि इतिहासाचा अपमान आहे. त्यामुळे या चित्रपटावर तात्काळ बंदी आणली पाहिजे. छत्रपती शिवाजी महाराजांचा इतिहास हा कोट्यवधी जनतेच्या श्रद्धेचा विषय आहे. त्यामुळे त्यांचे विकृतीकरण करणे हे सार्वजनिक सुव्यवस्थेस बाधक ठरू शकते व सामाजिक तणाव व जनक्षोभ निर्माण करण्याचा संभव आहे. याची शासनाने वेळी दाखल घ्यावी, असे या निवेदनाद्वारे सांगण्यात आले आहे.
निवेदन देताना सर्वश्री राजेंद्र सावंत, शशिकांत जाधव, देवेंद्र झापडेकर, अमितराज खटावकर, शैलेश बेर्डे, अरविंद बारस्कर, प्रकाश सावंत, गोविंद भारद्वाज, संजय जोशी, बंडू चेचरे, विष्णु बगाडे आदि उपस्थित होते.
त्याचप्रमाणे हिंदू जनजागृती समिती आणि श्री शिवप्रतिष्ठान हिंदुस्थान यांच्या कार्यकर्त्यांनी शहरातील सिटी प्राईड सिनेमागृहात जाऊन व्यवस्थापकांची भेट घेतली. हिंदुत्वनिष्ठांच्या भावना सिनेमागृहाच्या मालकांपर्यंत पोहोचवाव्या आणि छत्रपती शिवाजी महाराजांचा चुकीचा इतिहास प्रदर्शित करणारा खालीद का शिवाजी हा चित्रपट प्रदर्शित करू नये, अशी त्यांना विनंती केली.