रेल्वेने ज्येष्ठ नागरिकांना दिली गुरुपौर्णिमेची भेट!

• मुंबई लोकलमध्ये पहिला विशेष डबा सुरू!

मुंबई: मुंबईच्या जीवनवाहिनी असलेल्या लोकल प्रवासात ज्येष्ठ नागरिकांना होणारा त्रास लक्षात घेऊन, मध्य रेल्वेने गुरुवारी १० जुलै २०२५ रोजी एक ऐतिहासिक पाऊल उचलले आहे. खास ज्येष्ठ नागरिकांसाठी खास तयार केलेला पहिला डबा (सिनियर सिटिझन कोच) सीएसएमटी-डोंबिवली लोकलमध्ये दुपारी ३:४५ वाजताच्या फेरीसह सुरू झाला आहे. या विशेष डब्यामुळे ज्येष्ठ नागरिकांचा प्रवास अधिक आरामदायी, सुरक्षित आणि सुखकर होणार आहे.

काय आहे या विशेष डब्यात?
मध्य रेल्वेने माटुंगा कारखान्यात एका डब्यात आवश्यक ते बदल करून हा आकर्षक डबा तयार केला आहे. या डब्याची वैशिष्ट्ये खालीलप्रमाणे आहेत:

• वाढलेली आसन क्षमता: या डब्यात १३ प्रवाशांसाठी आसन व्यवस्था करण्यात आली आहे, ज्यात तीन ३-सीटर बेंच आणि दोन २-सीटर युनिट्सचा समावेश आहे. याशिवाय, ५० हून अधिक प्रवासी उभे राहू शकतील एवढी जागा उपलब्ध आहे.
• सुरक्षितता वैशिष्ट्ये: ज्येष्ठ नागरिकांच्या सुरक्षिततेसाठी दोन्ही दरवाजांच्या पायदानाखाली आपत्कालीन शिडी बसवण्यात आली आहे. तसेच, डब्यात ग्रॅब पोल्स (पकडण्यासाठी हँडल) लावण्यात आले आहेत.
• सौंदर्यात्मक सुधारणा: डब्याच्या आतील भागात निसर्गचित्रे, गेटवे ऑफ इंडिया आणि सीएसएमटी वास्तूच्या चित्रांचे सुंदर व्हिनाइल रॅपिंग करण्यात आले आहे, ज्यामुळे प्रवासाचा अनुभव अधिक आनंददायी होईल.
• सुधारित रचना: स्टेनलेस स्टील ट्यूबलर पार्टिशन्समुळे डब्याची रचना सुधारली आहे आणि दृश्यमानता चांगली झाली आहे.
• स्थान: सीएसएमटीच्या टोकापासून सहाव्या क्रमांकावर हा डबा असेल.
  इतर प्रवाशांना दंड:
  या विशेष डब्यात केवळ ज्येष्ठ नागरिकांनाच प्रवास करण्याची परवानगी असेल. ज्येष्ठ नागरिकांव्यतिरिक्त इतर कोणत्याही प्रवाशाने या डब्यातून प्रवास केल्यास त्यांना १०० ते १५० रुपयांपर्यंत दंड आकारला जाईल, अशी माहिती मध्य रेल्वेच्या अधिकाऱ्यांनी दिली आहे.
  सर्व गाड्यांसाठी लवकरच उपलब्ध:
  सध्या हा पहिला डबा सुरू झाला असला तरी, मध्य रेल्वे येत्या १८ महिन्यांत त्यांच्या ताफ्यातील सर्व १५७ नॉन-एसी लोकलमध्ये अशा प्रकारचे विशेष डबे तयार करणार आहे. यासाठी ७ कोटी ५७ लाख ३० हजारांचा खर्च अपेक्षित आहे. पश्चिम रेल्वे देखील त्यांच्या १०५ लोकलमध्ये हे बदल करणार आहे. उच्च न्यायालयाच्या निर्देशानुसार रेल्वे प्रशासनाने ज्येष्ठ नागरिकांसाठी हा महत्त्वाचा निर्णय घेतला आहे.
  या उपक्रमामुळे दररोज लाखो ज्येष्ठ नागरिकांना त्यांच्या मुंबईतील लोकल प्रवासात मोठा दिलासा मिळणार आहे. भारतीय रेल्वेचा हा निर्णय नक्कीच कौतुकास्पद आहे.

• हे देखील अवश्य वाचा : Konkan Railway | दादर- सावंतवाडी राज्यराणीला तुतारी एक्सप्रेस का म्हणतात?
• छोटा भीमचा रेल्वे प्रवाशांना मोठा संदेश!
• पनवेलच्या आंतरराष्ट्रीय विमानतळावरुन सप्टेंबरपासून उड्डाण!