गणपतीपुळे येथील समुद्रात भिवंडीतील पर्यटक बुडून बेपत्ता; दोघांना वाचवले

• जेटस्की बोटीच्या मदतीने दोघांना वाचवण्यात यश

रत्नागिरी :  ठाणे जिल्ह्यातील भिंवडी येथून गणपतीपुळे येथे देवर्शन व पर्यटनासाठी आलेल्यांपैकी तिघेजण सायंकाळी ६ वाजण्याच्या सुमारास बुडाले. मदतीसाठी आरडाओरड झाल्यानंतर यातील दोघांना जेटस्की बोटीच्या मदतीने वाचवण्यात यश आले असून अमोल गोविंद ठाकरे (25) हा युवक मात्र बुडून बेपत्ता झाला आहे. किनाऱ्यावरील जीवरक्षक तसेच मंदिर प्रशासनाकडून वारंवार सूचना देवूनही पर्यटक समुद्रस्नान करताना खबरदारी घेत असल्याचे उघड झाले आहे.
ठाणे जिल्ह्यातील भिवंडी येथील काही मित्र शनिवारी गणपतीपुळे येथे देवदर्शन आणि पर्यटनासाठी आले होते. मंदिरात दर्शन घेतल्यानंतर सायंकाळी 6 वाजण्याच्या सुमारास ते सर्वजण मंदिरानजीकच्या समुद्रात उतरले असताना यातील तिघेजण बुडू लागले. या नंतर किनाऱ्यावर आरडाओरड झाल्यावर जीवरक्षकांनी बुडणाऱ्या तिघांपैकी दोघांना  (नावे समजू शकलेली नाहीत) किनाऱ्यावर सुरक्षित आणले.  मात्र, यातील अमोल गोविंद ठाकरे  (25) हा समुद्रात बेपत्ता झाला आहे.

या घटनेची माहिती मिळताच जयगड पोसिल घटनास्थळी दाखल झाले आहेत.