पुणे: बिहारची कन्या आणि आपल्या सुरेल आवाजाने अवघ्या जगाला मंत्रमुग्ध करणारी लोकप्रिय युवा गायिका मैथिली ठाकूर (Maithili Thakur) हिच्या शिरपेचात आणखी एक मानाचा तुरा रोवला गेला आहे. विशेष म्हणजे, मैथिलीच्या जीवनावर आधारित पहिले पुस्तक तिच्या मातृभाषेत (मैथिली) किंवा हिंदीत नसून चक्क मराठी भाषेत प्रकाशित झाले आहे. पुण्यात आयोजित ‘कोंढवा महोत्सवाच्या’ निमित्ताने हा सुखद सोहळा पार पडला.
पुण्याच्या कोंढवा महोत्सवात पुस्तक प्रकाशन
पुण्यातील कोंढवा महोत्सवात मैथिली ठाकूर हिला निमंत्रित करण्यात आले होते. यावेळी लेखक सुनील पांडे लिखित ‘लोकप्रिय युवा गायिका मैथिली ठाकूर’ या चरित्रपर पुस्तकाचे प्रकाशन करण्यात आले. स्वतःवरचे पहिले पुस्तक मराठी भाषेत पाहून मैथिली भारावून गेली होती. तिने सोशल मीडियाच्या माध्यमातूनही आपल्या भावना व्यक्त करताना, हा आपल्यासाठी ‘सौभाग्याचा क्षण’ असल्याचे म्हटले.
गायिका ते आमदार: मैथिलीचा प्रेरणादायी प्रवास
मैथिली ठाकूर आता केवळ एक गायिका राहिलेली नाही, तर ती बिहारच्या राजकारणातील एक उगवता तारा ठरली आहे. २०२५ च्या बिहार विधानसभा निवडणुकीत अलीनगर मतदारसंघातून विजय मिळवून ती तरुण आमदार म्हणून निवडून आली आहे. संगीताच्या क्षेत्रातून थेट लोकप्रतिनिधी म्हणून काम करतानाही तिचे मराठी भाषेबद्दलचे प्रेम अतोनात आहे.
“महाराष्ट्राने मला भरभरून प्रेम दिले”
पुस्तक प्रकाशन प्रसंगी मैथिली म्हणाली,
”माझी मातृभाषा मैथिली असली, तरी महाराष्ट्राने आणि मराठी भाषेने मला नेहमीच आपलंसं केलं आहे. माझ्या आयुष्यातील पहिलं पुस्तक एका मराठी लेखकाने लिहावं आणि ते महाराष्ट्रात प्रकाशित व्हावं, ही माझ्यासाठी खूप मोठी गोष्ट आहे.”
ठळक वैशिष्ट्ये
- पुस्तकाचे नाव: लोकप्रिय युवा गायिका मैथिली ठाकूर
- लेखक: सुनील पांडे
- स्थळ: कोंढवा महोत्सव, पुणे
- विशेष: मैथिलीच्या गायकीचा गौरव आणि आमदार म्हणून निवडून आल्यानंतरचा पुण्यातील पहिला मोठा सन्मान.
दखल घेण्याजोगे!
मैथिली ठाकूरने तिच्या शास्त्रीय आणि लोकसंगीताच्या जोरावर बिहारसह संपूर्ण भारतात ओळख निर्माण केली आहे. महाराष्ट्रातही तिचा मोठा चाहता वर्ग असून तिने अनेक मराठी अभंग आणि गाणीही गायली आहेत. तिचे हेच ‘मराठी कनेक्शन’ आता या पुस्तकाच्या रूपाने कायमस्वरूपी अधोरेखित झाले आहे.
