रेल्वे प्रवाशांसाठी खूषखबर! सुरत-मंगळूरू ‘स्पेशल’ ट्रेन आता कायमस्वरूपी धावणार!
- खेड, चिपळूण, सावर्डा, संगमेश्वर रोड, रत्नागिरी, राजापूर रोड, वैभववाडी रोडलाही थांबणार
रत्नागिरी : कोकण रेल्वे मार्ग आणि दक्षिण भारतात प्रवास करणाऱ्या प्रवाशांसाठी भारतीय रेल्वेने एक मोठी आनंदाची बातमी दिली आहे. पश्चिम रेल्वेने सुरत ते मंगळूरू दरम्यान चालवली जाणारी ‘स्पेशल’ ट्रेन आता नियमित (Regularise) करण्याचा निर्णय घेतला आहे. रेल्वे बोर्डाने २० मार्च २०२६ रोजी प्रसिद्ध केलेल्या अधिकृत परिपत्रकानुसार, गाडी क्रमांक ०९०५७/०९०५८ ही विशेष गाडी आता १९०५७/१९०५८ सुरत-मंगळूरू एक्सप्रेस म्हणून ओळखली जाईल. किती तारखेच्या फेरीपासून ही गाडी नियमित धावणार याची माहिती अद्याप उपलब्ध व्हायची आहे.
नव्याने जाहीर झालेले वेळापत्रक (Train Timings)
रेल्वे बोर्डाच्या आदेशानुसार या गाडीचे नियमित वेळापत्रक खालीलप्रमाणे असेल:
१. गाडी क्रमांक १९०५७ (सुरत ते मंगळूरू):
- दिवस: दर बुधवारी आणि रविवारी ही गाडी सुरतवरून सुटेल.
- वेळ: सुरतवरून संध्याकाळी १९:३५ वाजता सुटून दुसऱ्या दिवशी रात्री १९:४५ वाजता मंगळूरूला पोहोचेल.
२. गाडी क्रमांक १९०५८ (मंगळूरू ते सुरत):
- दिवस: दर गुरुवारी आणि सोमवारी ही गाडी मंगळूरूवरून सुटेल.
- वेळ: मंगळूरूवरून रात्री २२:३० वाजता सुटून दुसऱ्या दिवशी रात्री २३:४५ वाजता सुरतला पोहोचेल.
प्रमुख थांबे (Stoppages)
या गाडीला प्रवाशांच्या सोयीसाठी कोकण रेल्वे आणि पश्चिम रेल्वेच्या महत्त्वाच्या स्थानकांवर थांबा देण्यात आला आहे:
- महाराष्ट्र: उधना, वलसाड, वापी, पालघर, वसई रोड, भिवंडी रोड, पनवेल, पेण, रोहा, माणगाव, खेड, चिपळूण, सावर्डा, संगमेश्वर रोड, रत्नागिरी, राजापूर रोड, वैभववाडी रोड, कणकवली, कुडाळ, सावंतवाडी रोड.
- गोवा: थिवीम, करमळी, मडगाव, काणकोण.
- कर्नाटक: कारवार, अंकोला, गोकर्ण रोड, कुमठा, मुरुडेश्वर, भटकळ, मुकांबिका रोड बायंदूर, कुंदापुरा, उडुपी, मुल्की, सुरथकल.
कोकण रेल्वेच्या प्रवाशांना मोठा दिलासा
ही गाडी नियमित झाल्यामुळे विशेषतः दक्षिण कोकणात (रत्नागिरी, सिंधुदुर्ग) आणि गोवा-कर्नाटक किनारपट्टीवर जाणाऱ्या प्रवाशांची मोठी सोय होणार आहे. यापूर्वी ही गाडी ‘स्पेशल’ म्हणून चालवली जात असल्याने तिच्या फेऱ्यांबाबत अनिश्चितता असायची, मात्र आता नियमित झाल्याने प्रवाशांना आगाऊ आरक्षण करणे सोपे जाईल.
महत्वाची टीप: प्रवाशांनी प्रवासापूर्वी अधिकृत रेल्वे संकेतस्थळावर किंवा ‘NTES’ ॲपवर वेळापत्रकाची खात्री करून घ्यावी, असे आवाहन करण्यात आले आहे.
