चिपळूण : डॉ. बाळासाहेब सावंत कोकण कृषी विद्यापीठ, दापोली आयोजित ‘मयूरपंख २०२६’ या आंतरमहाविद्यालयीन सांस्कृतिक युवा महोत्सवात जिजामाता महिला कृषी महाविद्यालयाची, विद्यार्थिनीने चमकदार कामगिरी करत यश संपादन केले आहे.
कृषीभूषण डॉ. तानाजीराव चोरगे शिक्षण व संशोधन संस्था संचलित या महाविद्यालयाची विद्यार्थिनी कु. गायत्री चैतन्य मांगडे हिने एकपात्री अभिनय स्पर्धेत तृतीय क्रमांक पटकावून महाविद्यालयाच्या शिरपेचात मानाचा तुरा रोवला.
दापोली येथील कृषी महाविद्यालयात १ ते ३ सप्टेंबर २०२६ दरम्यान या तीन दिवशीय कलामहोत्सवाचे आयोजन करण्यात आले होते. या महोत्सवातील नाट्य कला प्रकारात कु. गायत्री मांगडे हिने आपल्या उत्कृष्ट अभिनय कौशल्याच्या जोरावर एकपात्री अभिनय स्पर्धेत ३ रे पारितोषिक मिळवले.
विद्यार्थिनींच्या या उल्लेखनीय यशासाठी संस्थेचे मुख्य कार्यकारी अधिकारी डॉ. निखिल चोरगे, जिजामाता महिला कृषी महाविद्यालयाच्या प्राचार्या डॉ. शमिका चोरगे, गोविंदरावजी निकम कृषी महाविद्यालयाचे प्राचार्य डॉ. संकेत कदम आणि उपप्राचार्य श्री. बाळासाहेब सूर्यवंशी यांचे मोलाचे मार्गदर्शन लाभले. या यशाबद्दल महाविद्यालयातील सर्व प्राध्यापक, कर्मचारी आणि विद्यार्थिनींनी विजेत्या गायत्री मांगडे हिचे अभिनंदन करून पुढील वाटचालीस शुभेच्छा दिल्या आहेत.
