रत्नागिरी /मुंबई : गणेशोत्सवाच्या काळात कोकणात जाणाऱ्या आणि परतणाऱ्या भाविकांची अतिरिक्त गर्दी लक्षात घेता दक्षिण मध्य रेल्वेने (SCR) मोठा दिलासा दिला आहे. नांदेड रेल्वे विभागांतर्गत हुजूर साहेब नांदेड आणि सावंतवाडी रोड स्थानकादरम्यान गाडी क्रमांक ०७६५९ / ०७६६० या फेस्टीव्हल स्पेशल गाड्या चालवण्याचा निर्णय घेण्यात आला आहे.
विशेष ट्रेनचे वेळापत्रक आणि फेऱ्या
गणेशोत्सवाच्या काळात १२, १४, १५ आणि १७ सप्टेंबर २०२६ या तारखांना या गाड्या धावतील:
- ट्रेन क्रमांक ०७६५९ (एच.एस. नांदेड ते सावंतवाडी रोड): १२ आणि १५ सप्टेंबर २०२६ रोजी नांदेडवरून सुटेल.
- ट्रेन क्रमांक ०७६६० (सावंतवाडी रोड ते एच.एस. नांदेड): १४ आणि १७ सप्टेंबर २०२६ रोजी सावंतवाडी रोडवरून परतीच्या प्रवासासाठी सुटेल.
️ तिकीट बुकिंग सुरू
- ट्रेन क्र. ०७६५९ (नांदेड ते सावंतवाडी रोड) साठी तिकीट बुकिंग अधिकृतपणे सुरू झाले आहे.
- प्रवाशांनी आयआरसीटीसी (IRCTC) संकेतस्थळावरून किंवा रेल्वे स्थानकावरील आरक्षण केंद्रांवरून आपले तिकीट लवकरात लवकर बुक करावे.
प्रमुख थांबे
ही विशेष रेल्वे गाडी मराठवाडा, पश्चिम महाराष्ट्र आणि कोकणातील प्रमुख स्थानकांवर थांबणार आहे:
- पूर्णा, परभणी, परळी वैजनाथ, लातूर रोड, लातूर, येडशी, धाराशिव, बार्शी टाऊन, कुर्डुवाडी, दौंड, पुणे, लोणावळा, कल्याण, पनवेल, पेण, रोहा, माणगाव, खेड, चिपळूण, संगमेश्वर, रत्नागिरी, राजापूर रोड, वैभववाडी रोड, कणकवली आणि कुडाळ.
गणपती उत्सवात आपला प्रवास सुखकर व विनासायास व्हावा यासाठी रेल्वेच्या या सुविधेचा लाभ घ्यावा, असे आवाहन रेल्वे मंत्रालयाने केले आहे.
