- शासकीय योजनांची माहिती थेट वारकऱ्यांपर्यंत!
पंढरपूर : पंढरपूरच्या आषाढी वारीत यंदा एक आगळावेगळा ‘विकास रथ’ वारकऱ्यांचे लक्ष वेधून घेत आहे. “जमला वारकऱ्यांचा मेळा, फुलला भक्तिभावाचा मळा; योजनांच्या माहितीचा, विकास रथ आगळा!” या घोषवाक्यासह हा रथ महाराष्ट्र शासनाच्या विविध कल्याणकारी योजनांची माहिती दीनदुबळ्या आणि शोषित घटकांपर्यंत पोहोचवत आहे. या अभिनव उपक्रमाला वारकऱ्यांकडून उत्स्फूर्त प्रतिसाद मिळत असून, माहितीच्या प्रसारासाठी ही एक प्रभावी माध्यम ठरत आहे.
राज्यातील शेवटच्या माणसापर्यंत विकासाचे लाभ पोहोचावेत या उद्देशाने महाराष्ट्र शासनाने अनेक महत्त्वपूर्ण योजना सुरू केल्या आहेत. या योजनांची माहिती सामान्य नागरिकांपर्यंत पोहोचवणे हे एक मोठे आव्हान असते. आषाढी वारीतील जनसमुदाय पाहता, या रथाच्या माध्यमातून थेट लाखो वारकऱ्यांपर्यंत योजनांची माहिती पोहोचवणे शक्य झाले आहे.
या महालरुपी रथावर विविध शासकीय योजनांची आकर्षक मांडणी करण्यात आली आहे. आरोग्य, शिक्षण, कृषी, रोजगार, महिला व बालविकास अशा अनेक क्षेत्रांतील योजनांची सविस्तर माहिती सोप्या भाषेत उपलब्ध करून देण्यात आली आहे. रथावर असलेले माहितीफलक, दृकश्राव्य सादरीकरण आणि उपस्थित कर्मचाऱ्यांकडून दिली जाणारी माहिती यामुळे वारकरी मोठ्या संख्येने थांबून योजनांची माहिती घेत आहेत.
“भक्तीसोबतच विकासाचे ज्ञानही मिळावे, ही या रथामागील संकल्पना आहे. वारकरी सांप्रदाय हा समाजाचा एक महत्त्वाचा घटक आहे आणि त्यांच्यापर्यंत शासनाच्या योजना पोहोचणे अत्यंत आवश्यक आहे,” असे एका सरकारी अधिकाऱ्याने सांगितले.
या ‘विकास रथा’मुळे वारकऱ्यांमध्ये शासकीय योजनांबद्दल जागरूकता वाढत असून, अनेक गरजू नागरिकांना त्यांच्यासाठी असलेल्या योजनांची माहिती मिळाल्याने त्यांना मोठा फायदा होत आहे. आषाढी वारीतील हा ‘विकास रथ’ केवळ माहितीचा प्रसारच करत नाही, तर तो विकासाच्या आणि कल्याणाच्या दिशेने टाकलेले एक महत्त्वाचे पाऊल ठरत आहे.
